Overpass, UP Gym

Mahirap pumasok sa eskwelahan
nang umaalingawngaw sa aking isipan
ang imahe ng iyong katawan
na nakaratay sa tapat ng overpass
na aking inaakyatan sa tuwing ako'y papasok sa eskwela.
Ang swimming pool sa PE 103 ay nagmistulang dugo
na kumalat sa semento
kung saan ka lumagpak.
Ang pahina ng kwaderno ay puti -
matingkad parang nang bangkay
na sumalubong pagbaba ko mula sa FX.
Hinihintay ng tahimik na kapaligiran
ang iyong pag-akyat
at pagmunimuni sa gitna ng overpass
hanggang sa ikaw ay tangayin ng malakas na hangin
sa umagang maginaw at mabigat.
Ang dabog ng iyong katawan sa iyong pagbagsak ay uugong
kasabay ng imahe ng iyong bangkay.